Марги чор нафар дар пайи садамаҳои ду рӯзи гузашта

Дар пайи ду садама, ки рӯзҳои 14 ва 15-уми март дар ноҳияҳои Рӯшон ва Данғара рух додаанд, чор нафар ҷон бохтааст.

Ба иттилои Вазорати корҳои дохилии кишвар, дар садамаи аввал рӯзи 14-уми март як мошини “Хундай-Галопер” аз роҳ берун шуда, ба чуқурии тахминан 75 метр афтодааст. Ронандаи он Акбар Қурбонов, сокини 51-солаи Рӯшон буда, аз деҳаи Басид ба деҳаи Разучи ин ноҳия ҳаракат мекардааст.

Дар ин ҳодиса ду мусофири ин мошин – Эмомгул Маҷнунови 70-сола ва Асрор Мастонови 44-сола, ки сокинони Рӯшон будаанд, дар ҷойи воқеа ҷон бохтаанд. Ронанда ва як мусофири дигар бо ҷароҳатҳои вазнин дар шифохона бистарӣ шудаанд.

Дар садамаи дуюм, ки рӯзи 15-уми март дар ҳудуди деҳаи Лоҳури ноҳияи Данғара иттифоқ афтодааст, як мошини “Ваз 21 113” ба худрави барқии “Волсваген ID6” бархӯрдааст. Дар натиҷа, ронандаи мошини “Ваз 21 113” - Эмомалӣ Одинаев, сокини 30-солаи ноҳияи Данғара ва Ҳидоят Абдухолиқова, мусофири 51-сола мошини “Волсваген” ва сокини ноҳияи Кӯшониён дар ҷойи ҳодиса ҷон бохтаанд.

Тафсилоти дигари ин ду ҳодиса маълум нест. Мақомот гуфтаанд, ки таштишот идома дорад.