Президент Раҳмон: подшоҳи Урдунро ба Тоҷикистон даъват кард

Душанбе,6 ноя- Sputnik Эмомалӣ Раҳмон дар ҳошияи нишасти “Раванди Ақаба” таҳти унвони "Амният дар соҳаи зеҳни сунъӣ" дар шаҳри Остонаи Қазоқистон бо подшоҳи Шоҳигарии Ҳошимии Урдун Абдуллоҳи II мулоқот намуд.

Дар вохӯрӣ масоили таҳкими муносибатҳои дӯстӣ ва ҳамкории ду кишвар баррасӣ шуд.

Президент гуфт:“Мо кишвари Шуморо аз шарикони муҳими худ дар минтақаи Ховари Миёна ва ҷаҳони ислом медонем”.

Масоили вобаста ба таҳкими робитаҳои сиёсӣ, густариши ҳамкории иқтисодию тиҷоратӣ ва фарҳангию башарӣ байни ду кишвар баррасӣ гардид.

Аҳамияти тақвияти заминаи қарордодию ҳуқуқӣ, робитаҳои байнипарлумонӣ ва фаъол намудани абзорҳои дуҷониба, чун машваратҳои сиёсӣ ва комиссияи байниҳукуматии ҳамкории иқтисодию тиҷоратӣ, таъкид шуд.

Ҳамчунин доир ба ташаббуси Урдун ҷиҳати роҳандозии “Раванди Ақаба” ва ҳамдастии ду кишвар дар роҳи татбиқи босамару бехатар аз зеҳни сунъӣ ва технологияҳои муосири рақамӣ мубодилаи андеша сурат гирифт.

Дар рафти мулоқот доир ба авзои кунунӣ дар Ховари Миёна ва роҳҳои ҳалли сиёсию дипломатии низоъҳо дар ин минтақаи ҳассос машварат доир гардид.

Дар ҷараёни суҳбат Эмомали Раҳмон Подшоҳи Шоҳигарии Ҳошимии Урдун Абдуллоҳи II ҷиҳати анҷом додани боздид аз Тоҷикистон дар вақти барояш муносиб таклиф кард.