Гӯштини миллӣ дар ноҳияи Ховалинг

Ҳамасола дар қаламрави кишвар бахшида ба ҳаргуна ҷашну маросимҳои миллӣ мусобиқаҳои гуногуни варзишӣ гузаронида мешавад.

Ин навбат бо ташаббуси Мақомоти иҷроияи ҳокимияти давлатии ноҳия ва шахсони ватандӯсту меҳанпараст ва саховатпешаи ин диёр мусобиқаи гӯштини миллӣ дар ноҳияи зебоманзару сайёҳии Ховалинг гузаронида шуд.

Бояд зикр намуд, ки мусобиқаи гӯштини миллӣ бо иштироки меҳмонон ва паҳлавонҳои шинохтаи кишвар ва кишварҳои ҳамсоя доир гардида, дар он ҳаводорону мухлисони бешумор аз манотиқи гуногуни ҷумҳурӣ ба тамошо омаданд.

Дар ин мусобиқаи байналмилалӣ паҳлавонони шинохтаи ҷумҳурӣ, инчунин варзишгарон аз ҷумҳуриҳои Узбекистону Қазоқистон иштирок намуданд. Барои кормандони сохторҳои ҳифзи ҳуқуқи кишвар, аз ҷумла, Вазорати корҳои дохилӣ, Вазорати мудофиа, Прокуратураи генералии Ҷумҳурии Тоҷикистон ва Агентии назорати давлатии молиявӣ ва мубориза бо коррупсия дар гилеми алоҳида мусобиқа доир гардида, кормандони мақомоти ҳифзи ҳуқуқ бо ҳам рақобат намуданд.

Дар ин рақобатҳои варзишии сатҳи баланд дар баробари дигар варзишгарон ҳамзамон паҳлавонони Вазорати корҳои дохилӣ аз худ маҳорати баланди гӯштингирӣ нишон дода, табъи ҳаводорони ин соҳаи варзишро хуш намуданд.

Аз ҷумла, дар ин мусобиқа афсари Раёсати Қӯшунҳои дохилии ВКД лейтенанти калон Мирзоҷамол Рамазонов бар ҳарифи худ дастболо гардида, сазовори шоҳҷоизаи ин мусобиқа электромобил гардид.

Ҳамзамон дар ин сабқатҳо як қатор афсарону сарбозони Раёсати Қӯшунҳои дохилии ВКД фаъолона иштирок намуда, сазовори ҷоизаҳо гардиданд.

Гӯштингирон ва паҳлавонони мо тавонистанд дар рақобат бо ҳарифони хеш аз кишварҳои ҳамсоя аз худ маҳорати олии варзишӣ нишон диҳанд.

Лозим ба ёдоварист, ки дар ҷараёни баргузории мусобиқаи мазкур собиқадорону паҳлавонони шинохтаи мақомоти корҳои дохилӣ, ки чандин маротиба дар ин риштаи варзиш парчамбардорони кишвар гардидаанд, аз ҷониби ташкилкунандагони ин чорабинӣ бо туҳфаҳои хотиравӣ қадрдонӣ шуданд.

Тамоми ғолибони мусобиқа аз ҷониби роҳбарияти Мақомоти иҷроияи ҳокимияти давлатии ноҳия ва шахсони ватандӯсту меҳанпараст ва саховатпешаи ин диёр бо шоҳҷоиза ва дигар туҳфаҳои хотиравӣ сарфароз гадиданд.

Ин гӯштини байналмилалӣ бо иштироки паҳлавонону варзишгарони номӣ ва меҳмонони олиқадру чемпионҳои ҷаҳонӣ, инчунин наздики бист ҳазор тамошобин доир гардида, дар дили ҳаводорони худ меҳр ба ин намуди варзишро зиёд намуд.

Р.Илёсзода