Шикояти деҳқонони Масчоҳ аз рафтори кормандони тақсими барқ

Ин масъала ахиран дар як ҷаласаи ҳукумати маҳаллӣ баррасӣ гардида ва додситонӣ санҷиши онро оғоз кардааст. Масъулони Идораи барқ мегӯянд, ки қонуншиканиҳо ҳастанд ва бояд истифобарандагон усули замонавиро ба кор баранд.

Хӯҷимаҳмад Юлдошев ду гектар замини кишоварзӣ дорад ва дар он бедаву пахта мекорад. Имсол баръакси солҳои пеш умеди гирифтани ҳосили зиёд надорад. Аз камбуди об шикоят дорад.

Ин саҳмдори Хоҷагии деҳқонии "Гули Юлдош" мегӯяд, "талаби ман ин аст, ки об бошаду деҳқон кор кунад ва зиндагиашро пеш барад. Коргарони барқ ин корҳояшонро бас кунанд. Меоянд, дар мавсим барқро хомӯш мекунанд, гулҳои пахта мерезанд, баъд обро медиҳанд, ки дер мешавад".

Гулизор Давлатова, саҳмдори дигари хоҷагии деҳқонии "Гули Юлдош" мегӯяд, "ман ҳар сол аз 8 то 10 ҳазор, ва ба камияш 6 ҳазор сомонӣ месупорам. Боз хоҷагии моро 41 ҳазор сомонӣ қарздор баровардаанд. Мо пахтаро мекорем, моҳи май июн шавад, пойгоҳҳои обкаширо муҳр зада мераванд, ки пул супоред. Дар он ҳолат мо аз куҷо пул супорем? То ҳал мешавад, ки пахта беоб мемонад ва ҳосил талаф мешавад. Ин ҳамааш бар зарари деҳқон аст".

Ба иддаои онҳо, дар зимистон, ки аслан об намемонанд, ба ҳисобашон пули масрафи барқ меояд. Аз ҳамин сабаб даҳҳо ҳазор сомонӣ қарздор шудаанд.

Абушер Муҳаммадизода, саҳмдори Хоҷагии деҳқонии "Абуллобек" мегӯяд, ҳамасола деҳқононҳо аз ҳисоби барқ қарздор мешаванд ва ҳоло ба номи онҳо 84 ҳазор сомонӣ қарз навиштаанд, ки тавони пардохти онро надоранд. Мегӯяд, борҳо ба идораҳои барқи вилояту ноҳия ва дигар ниҳодҳо муроҷиат кардаанд, аммо касе ба додашон намерасад.

Ин вазъ чанд соли ахир ба миён омада, деҳқононро ба танг овардааст.

Гулизор Давлатова, саҳмдори хоҷагии деҳқонии "Гули Юлдош" мегӯяд, "чанд рӯз пеш дар ҳукумати ноҳия маҷлис шуд, деҳқонон хеста дар ин бора гап зададанд. Прокурор супориш додааст, ки назорат сахт шавад".

Масъулони Идораи барқ мушкилотро тасдиқ карданд ва гуфтанд, ки истифобарандагон талаботро риоя намекунанд.

Бобобек Бобобеков, сардори шӯъбаи шабакаҳои тақсимоти барқ дар ноҳияи Масчоҳ гуфт, "барои аз байн бурдани чунин гапҳо, ҳоло насби ҳисобкунакҳои интелектуалӣ (ҳушманд) ба роҳ монда шудааст. Мардум баъзан инро хуш қабул намекунанд. Агар инро мардум риоя кунанд, ман сад фоиз боварӣ дорам, ки ҳамин чизҳо ба пуррагӣ аз байн меравад".

Чанде пеш телевизионҳои давлатӣ ҳам дар як гузориш аз ноҳияи Масчоҳ, қонуншиканиҳои масъулони пойгоҳҳои обкаширо ба намоиш гузошта буданд.

‎Баҳси деҳқонон бо масъулони барқ сари он аст, ки ба фарқ аз аҳолӣ, ҳисобкунакҳоро бояд соҳибони пойгоҳҳои обкашӣ насб кунанд, ки ин харҷу вақт мехоҳад.

Аммо кишоварзон мегӯянд, ки то он давра бояд роҳи

изофанависии пули барқ гирифта шавад ва деҳқонон аз вартаи муфлисӣ берун бароянд.

Тоҷикистон як кишвари кишоварзӣ аст ва мушкилии обёриву дигар хароҷот барои деҳқонон аз масъалаҳои умда ба ҳисоб меравад.