БОЗДОШТИ ЯК ӮЗБЕКИСТОНӢ ДАР ИСРОИЛ ПАС АЗ НАШРИ НАВОРИ ФИРОРИ СОКИНОНИ ИН КИШВАР БА ПАНОҲГОҲҲО

Сафорати Ӯзбекистон дар Исроил боздошти як ӯзбекистониро дар пайи паҳни навори фирори исроилиҳо ба паноҳгоҳҳо шарҳ додааст. Ин ниҳоди дипломатии Ӯзбекистон гуфтааст, ки ҳодиса рӯзи 28-уми феврал рух дод.

Аз ин шаҳрванди Ӯзбекистон, Н.Х. ном бурда мешавад. Ӯ ҳангоми ҳамлаи мушакӣ ба Исроил ва баланд шудани бонги хатар дар ин кишвар дар наворе лаҳзаи фирори исроилиҳо ба паноҳгоҳҳоро сабт ва масхара кардааст.

Нашри ин навор дар “Tik-Tok” боиси хашми исроилиҳо шуда, ба гуфтаи Сафорати Ӯзбекистон, як сокини Исроил ин ҳодисаро ба мақомоти кишвараш хабар додааст.

Навори дастгир шудани муҳоҷири ӯзбекистонӣ ҳам, ки гуфта мешавад барои кор ба ин кишвар рафтааст, дар шабакаҳои иҷтимоӣ паҳн шуда буд.

Сафорати Ӯзбекистон гуфтааст, ки баъди ин, Консулгарии ин кишвар бо ин марди ӯзбекистонӣ тамос гирифтааст.

Маълум нест, ки ӯ раҳо шудааст, ё не. Вале Сафорати Ӯзбекистон изҳор доштааст, ки ҳоло шаҳрвандаш дар амн аст ва Консулгарии ин кишвар ҳодисаи мазкурро зери назорат гирифтааст.