Музокироти сеҷонибаи Русия, Украина ва Амрико дар Абу-Забӣ оғоз шуд

Дар шаҳри Абу-Забии Имороти Муттаҳидаи Арабӣ даври нави музокироти сеҷониба барои ҳалли ҷанги Русия дар Украина оғоз ёфт. Намояндагони Русия, Украина ва Амрико пас аз наздики 9 моҳ дигарбора сари мизи музокира нишастанд.

Ҳайати Русияро Владимир Мединский, ёвари раисҷумҳуриин кишвар, роҳбарӣ мекунад. Ба ин ҳайат, ҳамчунин, Сергей Рябков, муовини вазири корҳои хориҷӣ ва Алексей Комков, сардори Хадамоти робитаҳои байналмилалии Хадамоти федеролии амният (ФСБ)-и Русия шомиланд. Ҳайати Украинаро Рустам Умаров, раиси Созмони иттилоотии хориҷии ин кишвар роҳбарӣ мекунад. Аз сӯйи Амрико Стив Уиткофф ва Ҷаред Кушнер, фиристодаҳои раисҷумҳури ин кишвар дар музокирот иштирок доранд.

Мединский дар маросими оғози музокирот гуфт, ки ҳайати Русия умедвор аст, "нишасти имрӯза имкон медиҳад дар роҳи расидан ба сулҳ ба хотири манфиатҳои мардуми Русия ва Украина пешрафт ҳосил шавад".

Умаров ҳам дар саҳифаи "Телеграм"-аш навишт, ки "дар рӯзномаи музокирот масъалаҳои калидии қатъи даргириҳо ва наздиктар шудан ба сулҳ қарор доранд".

Қарор аст ҷонибҳо кафолатҳои амниятӣ, чораҳои коҳиши таниш, масъалаҳои башардӯстона ва гомҳои эҳтимолии минбаъда барои поён додан ба ҷанги Русия дар Украинаро баррасӣ кунанд.

Қаблан Уиткофф гуфта буд, ки иштирокдорони музокирот тавофуқҳои эҳтимолии ояндаро баррасӣ хоҳанд кард.

Музокироти сеҷониба байни Русия, Украина ва Амрико рӯзҳои 10-11 ноябр дар Абу-Забӣ баргузор мешавад. Дар он як ҳайати аврупоӣ ҳам ҳузур дорад, аммо мустақиман дар гуфтугӯҳо иштирок намекунад. Интизор меравад, ки яке аз мавзуъҳои асосии музокирот сохтори амниятии Аврупо пас аз поёни ҷанг бошад.