ХАБАРҲОИ БАРДУРӮҒРО ПАҲН НАКУНЕД!

Паҳн кардани иттилооти санҷиданашуда — хатар ба ҷомеа аст!

Паҳн кардани хабарҳои бардурӯғ (ё "фейк-нюз" / Fake news) яке аз мушкилоти бузургтарин ва хатарноки асри технология ва шабакаҳои иҷтимоӣ ба шумор меравад. Ин падида метавонад ба осонӣ афкори умумро гумроҳ кунад, ба обрӯи шахсиятҳо латма занад ва ҳатто суботи ҷомеаро вайрон созад.

Ҳамшаҳриёну ҳамватанони азиз! Имрӯз дар месенҷери "WhatsApp" хабари овозии бардурӯғе паҳн гардид, ки гӯё "аз Беморхонаи касалиҳои рӯҳӣ 6 нафар беморон гурехтаанд". Ин хабари беасос сокинонро ба таҳлука афканд.

Баъд аз паҳн шудани ин овоза, дар як муддати кӯтоҳ кормандони милитсияи шаҳри Исфара паҳнкунандаи ин хабари дурӯғро муайян ва дастгир намуданд.

Дар натиҷаи гузаронидани чорабиниҳои оперативӣ сокини ҷамоати деҳоти Хонаобод, деҳаи Баланд, кӯчаи Лоиқ Шералӣ, хонаи 5 — Ортиқов Иброҳим Кенҷаевич (соли таваллудаш 11.06.1999) дастгир карда шуд. Муайян гардид, ки номбурда худаш мубталои касалии рӯҳӣ мебошад.

Айни замон аз ҷониби мақомоти ҳифзи ҳуқуқ корҳои фаҳмондадиҳӣ рафта истодааст ва нисбати дастгиршуда чораҳои зарурӣ дида мешаванд.

МУРОҶИАТ БА СОКИНОН!

Хоҳишмандем, ба ҳар гуна овозаҳои беасос ва сабтҳои овозии сохта бовар накунед ва онҳоро ба дигарон нафиристед! Танҳо ба маълумоти расмӣ эътимод кунед. Сарчашмаи оромии ҷомеа — зиракии ҳар яки мост!