Дар паи селҳои ахир дар Тоҷикистон беморхонаву мактабҳои миёна ва хонаҳову роҳҳои мошингард осеб дидаанд

Баробар бо ин муассисаҳо, даҳҳо хонаҳои истиқоматӣ ва заминҳои наздиҳавлигӣ аз обу лойқа пур шудаанд ва мақомот ҳаҷми зиёнро арзёбӣ мекунанд.

Кумитаи ҳолатҳои фавқулодаи Тоҷикистон рӯзи 1 май дар бораи миқёси осеби расида аз боришоти зиёди рӯзи 30 апрел дар саросари ҷумҳурӣ гузориш дод ва аз ҷумла гуфт, таҳхонаи ду бемористон дар саросари кишвар пури об шудааст. Ҳанӯз хисороти молии офати табиӣ ҳисоб нашудааст, вале гурӯҳҳои наҷотбахшон ва мақомоти масъул барои рафъи ин оқибатҳо сафарбар шудаанд.

Аз ҷумла, ба навиштаи ин ниҳод, таҳхонаи таваллудхонаи шаҳрии №1 ва Беморхонаи ёрии таъҷилӣ дар шаҳри Душанбе аз об пур шуда, бо ёрии наҷотбахшон ин об берун карда шуд. Дар шаҳри Душанбе хонаҳои истиқоматӣ дар кӯчаҳои Н. Махсум, зери купруки кӯчаи Шамсӣ дар ҳудуди тарабхонаи «Арбат», кӯчаи Зафар, хонаи №11, инчунин манзилҳо дар ҳудуди Маркази саломатии шаҳрии №14 зери об монданд, менависад кумита.

Дар ноҳияи Рӯдакӣ бинои мактаби миёнаи №67 аз обу лойқа пур шуда, дар деҳаҳои Меҳрободу Чоряккорон нӯҳ замини наздиҳавлигиву ду таҳхона аз лойоба пур шудааст. Дар деҳаи Шайнак ба як замини наздиҳавлигӣ, як оғилхона, нуқтаи сӯзишворӣ, корхонаи хиштбарорӣ ва зиёда аз 50 сотих заминҳои кишоварзии ҶДММ «Раҷабалӣ Давлат» зарар расидааст.

Дар кӯчаи Рӯдакии ҷамоати шаҳраки Навобод ба 5 замини наздиҳавлигӣ ва 2 таҳхона, дар кӯчаи Котибон ба 6 замини наздиҳавлигӣ, 1 таҳхона ва 7 хонаи истиқоматӣ обу лойқа ворид гардид.

Сел ба ҳудуди ноҳияи Ҳисор ҳам расид. Дар деҳаи Ҳафттеппа масофаи тақрибан 200 метр роҳи мошингузари ҷамоат бо лойқа пур шуд ва баъдан тоза карда шуд. Дар деҳаи Ободдараи ҷамоати деҳоти Алмосӣ ба бинои Муассисаи таҳсилоти миёнаи умумии №91 обу лойқа ворид гардида, хонандагон сари вақт ба ҷойи бехавф кӯчонида шуданд, навиштааст кумита.

Олу лойқа рӯзи 30 апрел дар ноҳияи Ҳамадонии вилояти Хатлон ҳам ба заминҳои наздиҳавлигӣ, хонаҳои истиқоматӣ, заминҳои кишоварзӣ ва роҳҳои мошингузар зарар расонид. Дар ноҳияи Данғара беш аз 30 хонаи истиқоматӣ, заминҳои кишоварзӣ ва роҳҳои мошингузар дар ҷамоати деҳоти Корез ва ҳам деҳаи Навобод таҳти таъсири обу лой монд.

Мақомоти вилояти Суғд ҳам гуфтанд, дар ин ҷо деҳаи Навободи ҷамоати деҳоти Сурхи шаҳри Исфара осеб дида, дар баробари хонаву заминҳои мардум, купруки мошингузари болои маҳаллаи Навобод зарари ҷиддӣ дидааст. Комиссияи ҳолатҳои фавқулода дар ҷойи ҳодиса кор бурда, ҳаҷми зарарро муайян менамояд.

Дар ноҳияи Бобоҷон Ғафуров – дар деҳаҳои Охчашма, Қурғонча ва Султонободи ҷамоати деҳоти Исмоилӣ бар асари бориши зиёд ва жола аз таллу теппаҳо сел фаромад. Дар натиҷа ба заминҳои наздиҳавлигӣ, иншоотҳои ёрирасон, 5 гектар замини гандум, 1,5 гектар замини картошка, 20 гектар замини пахта ва боғҳои мевадиҳанда зарар расид, навиштааст Кумитаи ҳолатҳои фавқулода.

Айни замон, ин гузориш мегӯяд, сатҳи оби дарёҳо таҳти назорат буда ҳамаи шоҳроҳҳо ва ағбаҳои ҷумҳурӣ кушода аст ва ҳаракати нақлиёт таъмин мебошад.