Ду медали биринҷӣ ва роҳхат ба даври финалӣ: дастоварди муштзанони тоҷик дар мусобиқоти қаҳрамонии Осиё
Дар мусобиқоти қаҳрамонии Осиё, ки дар шаҳри Улан-Батор (Муғулистон) ҷараён дорад, мунтахаби муштзанони Тоҷикистон ба дарёфти ду медали биринҷӣ даст ёфта, инчунин як узви даста ба даври финалии рақобатҳо роҳ ёфт.
Узви дастаи ҷумҳурӣ Мижгона Самадова дар вазни 57 кг медали биринҷӣ ба даст овард. Дар даври чаҳорякфиналӣ ӯ бар намояндаи дастаи мизбон (Муғулистон) Номин Эрдене Тугжарал дастболо шуда, дар даври нимфиналӣ аз варзишгари Тайиланд Пунрави Руэнрос шикаст хӯрд ва ба медали биринҷӣ соҳиб шуд.
Ин медал брои Мижгона медали дуюм дар мусобиқоти қаҳрамонии Осиё аст. Бори нахуст ӯ соли 2021 дар Дубай ба ин комёбӣ ноил гардида буд.
Мусобиқоти қаҳрамонӣ (чемпионат)-и қораи Осиё дар Муғулистон таҳти сарпарастии World Boxing зиёда аз 230 варзишгарро аз 26 кишвари саросари дунё гирдиҳам овард.
Ба ҷуз Мижгона Самадова, дигар намояндагони тими Тоҷикистон Некрӯз Салимов (80 кг) ва Парвиз Каримов (90 кг) низ ба даври нимфиналӣ роҳ ёфта, Салимов низ боз ба дарёфти як медали биринҷӣ барои даста ноил гардид, ки аввалин медали муштзани тоҷик дар мусобиқоти қаҳрамонии маҳсуб меёбад.
Дар вазни 90 кг Парвиз Каримов дар рақобат бо намояндаи Ҳиндустон Харш Чоудхари дастболо шуда, ба даври финалӣ роҳ ёфт. Дар даври ниҳоӣ рӯзи 10 апрел ӯ бо намояндаи Ӯзбекистон Ҳалимҷон Мамасолиев барои дарёфти медали тилло рақобат мекунад.
Барои худи Каримов ин аллакай имкони дуюм барои ғолиб омадан дар мусобиқоти қаҳрамонии Осиё аст. Соли 2024 дар Тайиланд ӯ медали нуқраи ин мусобиқотро ба даст оварда буд. Акнун имкон дорад, ки боз як қадам пеш гузошта, ба дарёфти унвони қаҳрамони Осиё даст ёбад.
