Вазорати тандурустии Тоҷикистон эълон кардааст, ки дар нимсолаи аввал дар ҷумҳурӣ шаш ҳолати бемории малярия миёни шаҳрвандони хориҷӣ ба қайд гирифта шудааст
Дар шаш моҳи аввали соли 2026 дар Тоҷикистон сатҳи гирифторӣ ба аксари бемориҳои сироятӣ нисбат ба ҳамин давраи соли гузашта коҳиш ёфтааст.
Дар ин бора муовини аввали вазири тандурустӣ ва ҳифзи иҷтимоии аҳолии Тоҷикистон Саломиддин Юсуфзода зимни нишасти матбуотӣ хабар дод.
Вай афзуд, ки вазъи эпидемиологӣ нишон медиҳад, ки дар пайи татбиқи чораҳои пешгирӣ, ташхис ва маҳдудкунӣ шумораи гирифторон ба як қатор бемориҳои сироятӣ, аз ҷумла сурхча, кабудсулфа, гепатити вирусии навъи "А", сил, бемориҳои шадиди роҳҳои нафас, илтиҳоби шуш ва як қатор дигар бемориҳо коҳиш ёфтааст.
Дар ҳамин ҳол, масъулини вазорати тандурустӣ аз афзоиши баъзе бемориҳо, аз ҷумла лейшманиёз ва малярия хабар дод.
Ба иттилои Саломиддин Юсуфзода, дар нимсолаи аввал 7 ҳолати бемории малярия ба қайд гирифта шудааст, ки аз онҳо 6 нафар шаҳрвандони хориҷӣ ва як нафар шаҳрванди Тоҷикистон мебошанд.
Ин афрод аз кишварҳои қитъаи Африқо ва Афғонистон вориди ҷумҳурӣ шудаанд.
Инчунин, дар ин давра афзоиши ҳолатҳои гирифторӣ ба баъзе намудҳои гепатити вирусӣ ва менингит низ ба мушоҳида расидааст.
Ба гуфтаи масъулони соҳа, вазъи эпидемиологии кишвар таҳти назорати доимӣ қарор дошта, барои пешгирии паҳншавии бемориҳои сироятӣ тадбирҳои зарурии санитариву эпидемиологӣ ва эмгузаронӣ мунтазам амалӣ карда мешаванд.